ТР Дәүләт Советында мәгариф, мәдәният, фән һәм милли мәсьәләләр комитеты утырышы узды
Бүген ТР Дәүләт Советында мәгариф, мәдәният, фән һәм милли мәсьәләләр комитеты утырышы узды, анда мәдәни мирас объектларын һәм тарихи җирлекләрне саклауны хокукый җайга салуга төп игътибар бирелде.
Татарстан Республикасы мәдәни мирас объектларын саклау комитеты рәисе Иван Гущин хәбәр иткәнчә, республикада 6 меңгә якын объект дәүләт саклавында тора, аларның 70% ы тарихи җирлекләрдә. Алар, төзелешнең биеклеген чикләүне, архитектура күренешен саклауны һәм планлаштыру структурасын җайга салуны да кертеп, аерым хокукый яклауга дучар ителергә тиеш. Әмма тарихи җирлек статусы шәһәрләргә өстәмә ташламалар бирми һәм шәһәр төзелеше, хуҗалык һәм башка эшчәнлеккә җитди чикләүләр белән бәйле, бу шәһәрләр үсешен кыенлаштыра, дип билгеләп үтелде.
Төп проблемалар арасында объектларны торгызуга финанслар булмау, биналарның нык тузганлыгы, шәһәр инфраструктурасының сыйфатсызлыгы, һәйкәлләр, саклау зоналары территорияләренең тулы күләмдә расланмаган чикләре, туристлык продуктлары булмау, муниципаль дәрәҗәдә ресурслар һәм тәҗрибәләрнең җитәрлек булмавы аталды. Бу мәсьәләләрне хәл итүгә «Мәдәниятне үстерү» дәүләт программасы ярдәм итә, аның кысаларында саклау документациясен эшләү һәм агач төзелеш сәнгатен саклау буенча чаралар гамәлгә ашырыла. Шулай ук шәһәр төзелеше эшчәнлеге буенча ведомствоара комиссия дә эшли, аны Рөстәм Миңнеханов җитәкли.
Утырышта шулай ук Болгар дәүләт тарих-архитектура музей-тыюлыгы эше турында фикер алыштылар. 2024 елда Бөек Болгарда 909 меңнән артык кеше булган. Әмма туристларны җәлеп итү өчен актуаль проблемаларның берсе булып кунакханәләр җитмәү кала.
Ахырда депутатлар комитетның беренче яртыеллык хисабын игътибарга алдылар һәм өченче кварталга планны расладылар.