Татарстан Республикасы Фәннәр Академиясендә Татарстан Республикасы Дәүләт Советының мәгариф, мәдәният, фән һәм милли мәсьәләләр комитетының күчмә утырышы булды
Бүген Татарстан Республикасы Фәннәр Академиясендә Татарстан Республикасы Дәүләт Советының мәгариф, мәдәният, фән һәм милли мәсьәләләр комитетының күчмә утырышы булды. Фәннәр Академиясенең 2024 елдагы эшчәнлеге турында хисап тәкъдим ителде, шулай ук «Алдынгы инженерлык мәктәпләре» федераль проектын гамәлгә ашыру турында фикер алыштылар һәм мәдәни мирас һәм дини берләшмәләр мәсьәләләре буенча закон проектлары каралды.
Татарстан Республикасы Фәннәр академиясе президенты Рифкать Миңнеханов билгеләп үткәнчә, 2024 елда дәүләт бурычының барлык күрсәткечләре үтәлгән, академиянең диссертация советлары уңышлы эшли, аспирантлар саны арткан. Алай гына да түгел, 5-7 сыйныфлар өчен Тарих институты тарафыннан Татарстан Республикасы Мәгариф министрлыгы ярдәмендә эшләнгән «Безнең төбәк тарихы» дәреслеге Россиядә иң яхшыларның берсе дип танылды.
Ватанны саклаучылар елы кысаларында Фәннәр академиясе тарафыннан гамәлгә ашырыла торган «Татарлар Ватанга хезмәттә» фәнни программасына аерым игътибар бирелде. Программа татар халкының Россия дәүләте чикләрен формалаштыруга, үстерүгә һәм саклауга керткән өлешен өйрәнүгә юнәлдерелгән. Программа кысаларында быел апрель аенда «Халыклар һәм төбәкләр язмышында 1941-1945 еллардагы Бөек Ватан сугышы» халыкара фәнни форумы узачак.
Татарстан Республикасы Мәгариф һәм фән министры урынбасары Андрей Поминов «Алдынгы инженерлык мәктәпләре» проекты турында сөйләде. Ул югары уку йортларына ярдәм итүгә, махсуслаштырылган сыйныфлар һәм лабораторияләр булдыруга юнәлдерелгән. 2022 елдан «Промхимтех» «Алдынгы инженерлык мәктәпләре»нең һөнәри юнәлеш бирү проектларында 5000нән артык укучы катнашты.
Моннан тыш, парламентарийлар республика законнарын федераль нормаларга туры китерү өчен эшләнгән мәдәни мирас һәм дини берләшмәләр турындагы закон проектларын карадылар.