“Халык контроле” башка төбәкләргә дә тарала

Быел “Халык контроле” порталында яңа бүлекләр барлыкка киләчәк. Портал эшчәнлегенә идарәче оешмаларны җәлеп итү эше дә дәвам итә. Бу хакта Татарстанның Министрлар кабинетында узган брифингта мәгъ­лүмат­лаштыру һәм элемтә министры Роман Шәйхетдинов хәбәр итте.

Министр белдергәнчә, узып кикән елда «Халык контроле»нә 13 мең 251 гариза урнаштырылган. Аларның 7 мең 87се – 54 проценты хәл ителгән. 3 мең 322се кире кагылган, шуларның 1 мең 530ын кире кагуга акча юк­лыгы сәбәп булган. Хәзерге вакытта 721 гариза өчен җаваплы оешма ачыклана. Мөрәҗәгатьләрнең күпчелеге «Әйләнә-тирәне уңайлы итү», «Юл хәрәкәтен көйләү», «Җәмәгать транспорты», «Торак хуҗалыгы», «Чыбыксыз элемтә», «Чүплекләр» бүлекләренә кабул ителгән.

Роман Шәйхетдинов гаризалар өчен җаваплы оешмаларның рейтингы белән дә таныштырды. Беренче һәм икенче урыннарга Авыл хуҗалыгы һәм азык-төлек, Эчке эшләр министрлыклары урнашкан. Алар барлык гаризалар буенча чара күргән. Өченче урында – Экология министрлыгы, мөрәҗәгать­ләрең 94,6 проценты хәл ителгән. Сәнәгать һәм сәүдә министрлыгының да күрсәткече югары – 93,1 процент. Районнар арасында исә – Әлки, Кайбыч, Саба, Тәтеш, Теләче, Балык Бистәсе, Ютазы. Аутсайдерлар исемлегенә исә Транспорт һәм юл хуҗалыгы министрлыгы (48,09 процент), Дәүләт торак инспекциясе (39,64 процент) эләккән. Районнардан өлгермәүчеләр арасында Питрәч (48,97 процент), Алабуга (48 процент), Яңа Чишмә (33 процент), Әтнә (25 процент), Чүпрәле районнары бар. Чүпрәледә кабул ителгән 2 гаризаның берсе буенча да чара күрелмәгән.

Порталга хәбәр юллау өчен www.uslugi.tatar.ru сайтында теркәлеп була, хәбәрне кесә телефоны аша да урнаштырырга мөмкин. Сүз уңаеннан, беренче булып Татарстанда барлыкка килгән портал хәзер Удмуртия Республикасы һәм Приморье краенда да эшли башлаган.

(“Ватаным Татарстан”,   /№ 25, 19.02.2014/)