Мәктәп аттестатын алу өчен дәүләт имтиханы тапшыруның мәҗбүрилеге: Татарстан Мәгариф министрлыгы аңлатмасы
Массакүләм мәгълүмат чараларында һәм интернет-ресурсларда төп гомуми белем турында аттестат һәм урта гомуми белем турында аттестат алу өчен дәүләт йомгаклау аттестациясен (ГИА) узу мәҗбүри түгел дигән мәгълүмат таратыла.
Татарстан Республикасы Мәгариф һәм фән министрлыгы сезгә түбәндәгеләрне җиткерә.
Россия Федерациясендә мәктәптә белем бирү мәҗбүри. Һәркем гомуми белем бирү программасын үзләштерергә тиеш. Аттестат программаны үзләштерүне раслый.
2024/2025 уку елында аттестат алу өчен (төп гомуми белем дәрәҗәсендә дә, урта гомуми белем дәрәҗәсендә дә) һичшиксез кирәк:
- арадаш аттестацияне уңышлы узу (мәктәп программасын үзләштергәннән соң);
- зачет алырга: әңгәмә барышында – 9 нчы сыйныфлар өчен, йомгаклау иншасында (бәян итүдә) – 11 нче сыйныфлар өчен;
– дәүләт йомгаклау аттестациясен узарга: 9 нчы сыйныфлар өчен- ОГЭ, 11 нче сыйныфлар өчен – БДИ.
Күрсәтелгән этапларның һәркайсы мәҗбүри булып тора һәм гариза бирергә теләмәү (йомгаклау әңгәмәсе һәм ОГЭ (9 нчы сыйныф) һәм йомгаклау инша һәм БДИ (11 нче сыйныф) алдыннан), шәхси мәгълүматларны эшкәртүдән баш тарту яки башка сәбәпләр аркасында чыгарылырга тиеш түгел.
Аттестат алу өчен законнар башка вариантларны, мәсәлән, «традицион, совет мәктәп имтиханнарын» тапшыруны күздә тотмый.
Кызганычка каршы, кайбер ата-аналар дөрес булмаган мәгълүматлар таратучы, закон нормаларын дөрес аңлатмаучы, дәүләт йомгаклау аттестациясе системасына карата ялгыш фикергә китерүче блогерларга колак салуны дәвам итә. Мондый алым балаларның тулы мәктәп белеме алуга хокукларын бозуга китерә. 2024 елда, кат-кат кисәтүләргә карамастан, 10 укучы мәктәп белеме турында аттестатсыз калды, бу аларның киләчәктә белем алу траекториясен чикләде: әйтик, 10 нчы сыйныфка керү яки көллият/техникумга керү.
Гамәлдәге закон буенча, нәкъ менә 9 һәм 11 сыйныфларны тәмамлаучыларның ата-аналары балаларының мәктәптә белем алуын тәэмин итү өчен шәхси җаваплылык тоталар.
Йомгаклау әңгәмәсендә һәм дәүләт йомгаклау аттестациясендә катнашу өчен гариза бирмәгәннәр моны 2025 елның 28 мартына (9 нчы сыйныф) һәм 2025 елның 25 мартына (11 нче сыйныф) кадәр эшли ала.
Ата-аналар һәм җәмәгатьчелек белән эшләгәндә әлеге мәгълүматны исәпкә алуны сорыйбыз.