“Казан Экспо” халыкара үзәгендә Татарстан Республикасы Авыл хуҗалыгы һәм азык-төлек министрлыгының йомгаклау коллегиясе утырышы узды
Бүген Татарстан Республикасы Авыл хуҗалыгы һәм азык-төлек министрлыгының йомгаклау коллегиясе утырышы узды, анда ведомствоның 2024 елгы эшенә йомгаклар ясалды һәм 2025 елга бурычлар билгеләнде.
Татарстан авыл хуҗалыгы продукциясенең тулаем күләме буенча лидерлар өчлегенә керде, ул 2024 елда 341 млрд сумнан артык. Азык-төлек сәнәгате күләме 340,4 млрд сум тәшкил иткән.
Татарстан Республикасы Авыл хуҗалыгы һәм азык-төлек министры Марат Җаббаров, агросәнәгать комплексында республиканың позициясен ныгыту өчен, 2025 елда өч процент үсешне тәэмин итәргә кирәк, дип билгеләп үтте.
2024 елда Татарстан шулай ук 2,3 млн тонна сөт җитештергән, бу 2023 ел белән чагыштырганда 3,9% ка күбрәк, ә терлекчелек продукциясе күләме 181 млрд сумнан артып, Россия төбәкләре арасында икенче урынны тәэмин иткән.
Ел йомгаклары буенча Татарстан авыл хуҗалыгы предприятиеләренең кереме беренче мәртәбә 200 млрд сумнан артып киткән, бу 2023 ел белән чагыштырганда 20% ка күбрәк. Республика үзен тулысынча терлекчелек продукциясе белән тәэмин итә, шул исәптән 508 мең тонна ит һәм 1,6 млрд данәдән артык йомырка җитештерелгән.
Татарстан рәисе Рөстәм Миңнеханов авылның барлык хезмәтчәннәренә рәхмәт белдерде һәм республика Россиянең азык-төлек суверенитетын тәэмин итү буенча Россия Президенты Владимир Путин куйган бурычны уңышлы үти, дип ассызыклады.