Татарстан Халыклар дуслыгы йортында республикада миграция сәясәтен гамәлгә ашыру мәсьәләләре буенча “түгәрәк өстәл” утырышы узды.Анда парламент башлыгы Фәрит Мөхәммәтшин катнашты
Татарстан Халыклар дуслыгы йортында “түгәрәк өстәл” утырышы узды, анда республикада миграция сәясәтен гамәлгә ашыру мәсьәләләре, шулай ук миграция законнарына кагылышлы яңалыклар турында фикер алыштылар.
“Республика территориясендә агымдагы миграция хәлен контрольдә тоту максатларында Татарстан Халыклары ассамблеясе, республика министрлыклары һәм ведомстволары арасында миграция сәясәте өлкәсендә хезмәттәшлек турында килешү төзелде һәм, квартал саен киңәйтелгән составта «түгәрәк өстәл» утырышы уздыру турында килешүгә ирешелде”, - дип ассызыклады Фәрит Мөхәммәтшин.
Узган ел законсыз миграциягә каршы көрәшкә, шулай ук миграция сәясәтен камилләштерүгә юнәлдерелгән 14 яңа федераль закон кабул ителде. Аерым алганда, кабул ителгән чаралар мигрант балаларын мәктәпкә кабул иткәндә рус телен белү предметын мәҗбүри тикшерүгә кагылды.
“Закон Дәүләт Думасы тарафыннан кабул ителде. Хәзер әлеге яңалыкларны гамәлгә ашыру буенча системалы һәм институциональ яктан тәэмин ителгән эшне җайга салу мөһим”, - дип ассызыклады Фәрит Мөхәммәтшин. Узган ел республикада 99 меңнән артык мигрант исәпкә куелган. Яртысы диярлек эш максатыннан килгән (46,2%), 17% укуга һәм шәхси максатларга туры килә.