2025 елдан ипотека заемщикларының хокукларын яклау стандарты эшли башлаячак

2025 елның 2 гыйнвары, пәнҗешәмбе

2025 елның гыйнварыннан Россиядә ипотека заемщикларының хокукларын һәм мәнфәгатьләрен яклауга юнәлдерелгән яңа стандарт эшли башлаячак. Россия Банкы белән берлектә кредит оешмалары эшчәнлеге стандартлары буенча Комитет тарафыннан эшләнгән әлеге документ куркынычларны киметү һәм ипотека кредитлауның үтә күренмәлелеген арттыру максатын куя.

Заемщиклар өчен нәрсә үзгәрәчәк?

• банклар заем алучыларга кредит турында тулы һәм аңлаешлы мәгълүмат бирергә тиеш, шул исәптән куркынычлар, комиссияләр һәм мөмкин булган нәтиҗәләр турында;
• 30 елга кадәр срокка һәм торак бәясенең 80% тан да артмаган суммага килешүләр төзергә киңәш ителә.

Нинди тыюлар кертелә?

• акчаларны аккредитивларда озак вакыт урнаштыру тыела, чөнки алар кертемнәрне иминиятләштерү системасына керми. Акчалар саклауны тәэмин итә торган эскроу счетларына юнәлдерелергә тиеш;
• башлангыч взнос составында “кешбэк” ны исәпкә алырга ярамый;
• банкларга ставкаларны киметкән өчен йорт төзүчеләрдән акча алу тыела, әгәр бу торак бәясен арттыра икән.

Моннан тыш, банклар заемщикларга хезмәтләрнең реаль бәясе турында гадел мәгълүмат бирергә һәм кредит вакытыннан алда түләнгән очракта түләнгән акчаларның бер өлешен кире кайтарырга тиеш булачак.

Стандарт 2025 елның 1 гыйнварыннан барлык кредит оешмалары өчен мәҗбүри булачак һәм бу датадан соң төзелгән килешүләргә кагылачак.