Мөрәҗәгать уңай хәл ителгән!
🚌 Вәкаләтле вәкил ярдәмендә Татарстанның Кама Тамагы районы прокуратурасы мәктәпкә барганда балаларның иминлеген тәэмин итү турында карар чыгарды.
Безнең күбебез өчен мәктәпкә юл - дулкынланулар һәм төрле-төрле тарихлар белән тулы истәлекләр ул. Әмма ата-аналар өчен бу кайгырту чыганагы да: иң мөһиме - балаларының мәктәпкә тиз һәм куркынычсыз барып җитүе.
Ярдәм сорап миңа Кама Тамагы районыннан Р. мөрәҗәгать итте. Аның җирле мәктәптә белем алучы улы мәктәп автобусының уңышсыз маршруты аркасында көн саен озак вакытын юлда үткәрергә мәҗбүр була. Автобус малайны Олы Мәрәтхуҗа авылыннан алып китә, ә аннары, күрше бистәләргә кереп, озак бара. Нәтиҗәдә, аның улына көн саен 80 чакрым чамасы юл үтәргә туры килә, өйгә кичкә таба гына кайта.
Вәзгыятьне ачыклау һәм маршрутның нормативларга туры килүен тикшерү өчен Кама Тамагы районы прокуратурасы Дәүләт автоинспекциясе һәм җирле мәгариф идарәсе вәкилләре белән берлектә күчмә тикшерү уздырды. Юлга чыгу нәтиҗәләре буенча маршрут озынлыгы чыннан да билгеләнгән нормалардан артып киткәнлеге ачыкланды һәм араны кыскарту өчен үзгәрешләр кертелде. Әмма тукталышлар тәртибен Олы Мәрәтхуҗа авылы файдасына үзгәртү мөмкин түгел, дип билгеләп үтелде: мондый үзгәреш маршрут участокларының берсендә күз күреме җитәрлек булмаган куркыныч борылыш аркасында куркыныч тудырыр иде.
Тикшерү нәтиҗәләре буенча шулай ук Олы Мәрәтхуҗа авылында балалар туплау тукталышы тиешенчә җиһазланмаган: эскәмия һәм чүп савыты юк. Прокуратура Олы Салтык авыл җирлеге башлыгына әлеге хокук бозуны бетерүне таләп итеп күрсәтмә кертте.