Һәр студент хәрби әзерлек узсын (“Ватаным Татарстан”, /№ 20, 11.02.2014/)

          Бер елга армиягә китәргәме яисә вузда әзерлек алып, запастагы солдат яки сержант булып калыргамы икәнлеген егетләр үзләре хәл итәчәк. Петропавловск-Кам­чатскида студентлар белә­н очрашуда оборона министры урынбасары Николай Панков әлеге яңалыкның нечкә­лек­ләрен аңлатты. Ул хәбәр ит­кәнчә, хәрби әзерлек үтүне сайлаучыларга 450 сәгать теоретик дәресләр алырга һәм хәрби бүлектә 3 айлык җыенда катнашырга туры киләчәк. Әлеге әзерлек хәрби хезмәт узуга тиңләш­те­реләчәк. Аны тәмамлагач, егетләргә хәрби билет тапшырачаклар.

          Әзерлекне уни­вер­си­тетларның хәрби кафедрасында, хәрби-уку үзәгендә яки хәрби бүлектә узарга мөмкин булачак. Бүгенгә илдә 72 югары уку йортында хәрби кафедра һәм үзәкләр бар. Әмма бу җитәрлек түгел икән. Урыннар булмау сә­бәпле, ел саен 60 меңнән артык диплом алган солдат армиягә китәргә мәҗбүр. Министр урынбасары хәбәр иткәнчә, укыту процессын оештыру өчен хәрби полигоннар, ату урыннары заманча тренажерлар һәм махсус җиһазлар белән тәэмин ителәчәк.

          Моннан тыш, Оборона министрлыгы вәкиле Кораллы Көчләрдәге башка үзгә­реш­ләр турында да хәбәр иткән. Мәсәлән, якын ки­ләчәктә ар­миядә гыйльми роталар санын арттырырга җы­еналар икән. Исегезгә төшерәбез: барлык студентларны хәрби әзерлек аша уздыруны узган ел декабрь аенда Россия Президенты Владимир Путин тәкъдим итте. Аның фи­ке­ренчә, бу ысул хәрби хез­мәткә чакырмыйча да җи­тәрлек күләмдә запастагы солдат әзерләргә ярдәм итәчәк.