Ярдәм (Ватаным Татарстан”, № 116-117, 20 июль, 2013 ел)

        19 июль көндә Казанда куанычлы вакыйга булды. Мәскәү районында, Серов урамында (4 а йорт) “Күрү сәләтеннән мәхрүм инвалидлар өчен “Ярдәм” мөселман укыту-тернәкләндерү үзә­ге” ачылды. Россия һәм БДБ ил­ләрендәге бердәнбер, тиңе булмаган мәркәз бу.

Дөрес, мондый мәркәз – күр­мәү­челәрне рухи тернәк­ләндерү үзәге башкалабыз­ның Левченко бистә­сендә, “Сөләйман” мәчете бинасында эшли иде инде. Менә Ходайның рәхмәте белән ул иркен, яңа бинага күчте.

        – Бүген бездә дүртләтә бәйрәм. Беренчедән, Рамазан ае бара, икен­чедән, җомга көн, өченчедән, дини тернәк­ләндерү үзәге, дүртен­чедән, яңа мәчет ачыла, – дип котлады тантанага килгәннәрне Татарстан мөф­тие Камил хәзрәт Сәми­гуллин.

         Мөф­ти бәйрәм уңаеннан бу эшләр­нең башында торган “Сө­ләйман” мәчете имам-хатыйбы Илдар хәзрәт Баязитовка – чапан, бу идеяне күтәреп алган, изге эшкә зур ярдәм күрсәткән Казан мэры Илсур Метшинга Коръ­әни-кәримнең Казан басмасын бүләк итте. Илдар хәзрәт исә үзе әлеге вакыйганы: “Казанда быел ике могҗиза булды. Аның беренчесе Универсиада булса, икенчесе – “Ярдәм” мәчете”, – дип бәяләде. Тантанада дистәдән артык кеше чыгыш ясады. Шулардан берничә кешене аерым атап китмәсәк хата булыр.

        – Күрмәүчеләр йортына, автобус тукталышына да якын булсын дип тырышкансыз. Күрмәүчеләрне хаҗ­га алып бару юлын да таптыгыз, – дип үзәкнең беренче шәкерте Венера ханым Илсур Метшинга, күр­мәү­челәрне брайль системасы буенча Коръән укыту эшен оештырып җибәргән Мәликә абыстайга, Илдар һәм Илһам хәзрәтләргә иң изге теләк­ләрен җиткерде. Ингуш, дагъстанлы кардәш­ләре­без­не тыңлаганда күп­ләрнең күзләре дымланды. Дагъстаннан килгән Адәм, Мө­хәммәт, Сәет кардәш­ләребез нашид (бездәге салават әйтүгә туры килә) башкарганда, бу егетләрне ил буйлап ислам дәгъ­ватчысы итеп җибәрсәң дә була икән, дип соклануын яшермәде күпләр.

        Казан мэры Илсур Метшин: “Бу мәчеткә биш ел элек нигез салган идек. Ме­нә, ниһаять, ниятебез тормышка ашты. Ходай ярдәме, илебез, республика җитәк­челәре ярдәме белән кризисны да җиңдек, мәчет салырга акча да табылды. Аллага шөкер, Универсиаданы үткәрдек, мәчетебезне ачабыз. Нигезе нык булсын! Дин кардәш­ләребез артсын! Кыл­ган догаларыбыз кабул булсын! Бу эшкә бик күп кеше ярдәм итте – аларга Алланың рәхмәте яусын! Һәрберегезгә күңел тынычлыгы, тән рәхәте телим. Ходай Тәгалә барыбызны да саклап торсын. Аллага тапшырдык!” – дип хәер-фати­хасын биргәннән соң, җыел­ган халык, тәкбир әйтә-әйтә, мәчет эченә узды. Мәчет эчен тамаша кылганнан соң, мөфти Камил хәзрәт җомга намазы укытты.

          Сүз уңаеннан шуны да әйтик: мәчетнең архитекторы – Кол Шәриф мәчетен проектлаштырган остала­рыбызның берсе – Айвар Саттаров. Мәчет-мәркәз 2800 квадрат метр мәй­дан били. Аның манарасы кырык метрлы. Үзәк карамагында бер гектардан артык җир бар. Монда мини-футбол мәйданчыгы, шулай ук бик күркәм җиһаз­лан­дырылган балалар мәйдан­чыгы ясалган. Янәшәдә, койманың аръя­гында 50-60 машина кую урыны булдырылган. Мәчетнең җир асты катында күрмәүчеләр өчен брайль системасы буенча китап нәшир итә торган “Нур” басмаханәсе эшләя­чәк. Төп гыйбадәт залы – 300 кеше сыйдырышлы. Бина эчендә уку бүлмәләре, китапханә, спорт залы, ашханә бар. 68 кеше кунып яши ала. Мәчет ачылган көнне үк моңарчы “Сөләй­ман” мәчетендә укыган 25 кардәшебез монда күченгән иде инде. Алар – Дагъстан, Чечня, Ингушетия, Башкортстан, Татарстан мөселманнары.

        Биредә уку вакыты – бер ай. “Теләүчеләр бик күп. Бер урынга – унбиш кеше. Ятаклар 68 булса, берьюлы 120 кешегә сабак бирә алабыз. Үзебезнең казанныкылар йө­реп укый”, – дип сөйләде безгә Мәликә абыстай.